Эцэг эхчүүд, сурган хүмүүжүүлэгчид бид хүүхэд юуг сонирхож, яаж сурахыг хүсэж байгааг тэр бүр сонирхдоггүй, сайн мэддэггүй. Зөвхөн өөрсдийн хүссэнээр байлгадаг эсвэл багшийн өгсөн даалгаврыг хийлгэдэг. Даалгавар гэдэг даалгаж өгсөн заавал хийх зүйл гэж өрөөсгөл ойлгосоор ирсэн. Хүсээгүй зүйлээ хийх амар биш гэдгийг томчууд бид ч сайн мэднэ. Зуны амралт эхлэхэд “Хүүхдийн амралт эхэлсэн, хүүхэд амрах ёстой” гэж үздэг эцэг эхчүүд байхад “Өнөөдрөөс эхлээд даалгавраа хийх ёстой” гэдэг эцэг эхчүүд ч бий. Бид хэлэх төдий л цаг хугацаа өнгөрч, нэг л мэдэхэд сургууль орох болдог. Ихэнх нь “Манай хүүхэд өдөржин тоглоод номоо нээж ч хараагүй” гэнэ.
Зунжин тоглосон хүүхэд овоорсон даалгавар хийхэд тулгарах бэрхшээлийг хэрхэн давах вэ? Багшийн өгсөн даалгавар хүүхдэд сонирхолтой байна уу? Даалгавраар дамжуулан хүүхэд сурах үйлд хэрхэн сурч байна? Хүүхдэд хийхэд хэрэгтэй бөгөөд хялбар байна уу? зэргийг энэ номд онцгойлон анхаарсан болно. 
Амралтын үеэр сонирхолтой байдлаар сурсан хүүхэд сурах үйлд байнга суралцдаг. Харин амралтыг тоглож өнгөрөөсөн хүүхэд намар хичээл эхлэхэд амралтын хэмнэлээсээ тийм ч амар гарч чаддаггүй. Тийм ч учраас энэ ном хүүхдэд зуны амралтыг тоглонгоо сурч өнгөрүүлэхэд тусална.