Монгол хатад цагийг эзэлсэн хүчирхэг эзэнт гүрний Их хаадын сэнтийг түшиж хорвоог донсолгосон баатарлаг эрин зууны хөтөч болон мөнхөрчээ. Тэнгэрийн доорхийг захирах лугаа гэр бүл алтан ургийн бэр болох хосгүй төөрөг тэдэнд заяагдсан. Ухаалаг цэцэн хатад үр хүүхдээ өсгөн хүмүүжүүлж, төсөөлж эс мэдэх ирээдүйн догшин давалгаанд тэсч үлдэх оюун ухааны дархлааг төлөвшүүлж, эрдэм мэдлэг, соён гэгээрэл шашин шүтлэгийг дэмжин ивээж байв. Хатад хувь заяагаараа дэнчин тавих амь өрссөн гарцаагүй тэмцэлд ялж, хөвгүүдээ Их хааны сэнтийд залж байлаа. Тэд дайн тулаанд оролцож, хатгалдах илдэнд халхавч, хангинах зэвэнд бамбай болж, эзэнт гүрнээ хамгаалсан юм. Их хатдын гайхамшигт түүх зуун зууны мананд замхарсан боловч баларшгүй ул мөр нь тэдэнтэй түмэн шижмээр холбогдсон улс үндэстэн, газар нутаг бүхэнд оршин буй...