Хүн төрөлхтөн олон янзын соёлоо. авч үлдэхэд монголчууд хэр оролцоотой байж чадах вэ гэдэг сорилт бидний амьдралд тулгарч байна. Монголчууд өвөг дээдсийнхээ үлдээсэн соёлыг дараагийн үедээ дамжуулан өвлүүлэх үү, эс өвлүүлэх үү. Бидний үед олон янзын соёл устаж алга болох уу, эсвэл хойч үедээ бүрэн бүтэн дамжих уу. Энэ хорвоод Монгол гэж дуудуулж байгаагийнхаа хувьд эцэг, эх бид ирээдүйн монголчуудад юу өвлүүлэх вэ гэж өөрсдөөсөө асууцгаая.   Хариулт олохын тулд бид өөрсдөө соёлоо яаж таньж хэрхэн хэрэглэж эзэмшин ойлгож таашаасан билээ гэдгээ бодоцгооё. Биднийг монгол хүн болгох гэж ээж аав, хөгшид буурлууд юугаар үлгэрлэн хүмүүжүүлснийг саная. Бидний эргэн тойронд байгаа анхаарч тоогоогүй зүйлс маань устаж байгаа үнэт соёл биш биз? Долларын ханш, нүүрсний үнэ, зэсийн борлуулалт, цалингийн зээл, зээлийн хүү хэмээн бачимдаж байх хооронд, зөвхөн бид л ойлгож мэдэрч хойч үедээ дамжуулах ёстой нандин соёл үрэн таран болж байж ч мэднэ.  Соёлыг хадгалан хамгаалах, хайж олох, өвлөн уламжлуулах, сурч эзэмших үүрэг бидэнд ирэх үед Та Монгол соёлоо ойлгож хамгаалахад бэлэн үү?»

Энэ тухай тунгаан бодож, эх орондоо соёлоор баян амьдралыг бүтээхэд хүн бүр хувь нэмрээ оруулъя. Соёлт нийгэм, соёлтой монгол орон байж чадах тусам Монгол Улсын маань үндэс суурь төдийчинээ бат бөх болж, соёл уламжлал маань ч үнэ цэнтэй, дахин давтагдашгүй онцгой байж чадах билээ.

Улсын Их Хурлын гишүүн Цэдэвдамбын Оюунгэрэл