Санскритээр "Гити", төвдөөр "Гүр", монголоор "Дуулал" гэдэг, юун дуулал вэ? гэвэл "бясалгалын дуулал" гэдэг, юуг бясалгах дуулал вэ? гэвэл, дуу аялгууны хэмнэлийг сэтгэлийн хэмнэл, ухаарлын хэмнэл, эрчим хүч болгон бясалгах дуулал гэдэг, энэ нэгэн зүйл нь манай эриний II дахь мянган жилийн эхэнд Энэтхэгийн газар шашны нууц тарнийн ёсны 84 шидтэний бясалгалын дуулал болон дэлгэрч, улмаар Төвдийн газар нууц тарнич нэрт шүлэгч Миларайба, VI Далай лам Цанъянжамц, Ромбо Галданжамц нарын гүр дууллаар уламжилж, монголын газар Чин сүзэгт номунхан Лувсанноровшарав, түүний удаа дараагийн дүрүүдийн зохиосон гүр дуулал, Говийн ноён хутагт Данзанравжаагийн 86 эхт гүр дуугаар залгамжлан монгол уламжлал нь хөгжиж ирсэн байна. Өнөө хүртэл нууц нь тайлагдаагүй байгаа Равжаа хутагтын 86 эхт гүр дууны эгшгийн нууц цоож, Доктор Л.Эрдэнэчимэгийн эл судалгааны түлхүүрээр бас давхар түлхүүрдэн онгойход хүрч байна. "Арвис эрдмийн дуу", "Бурханы дуу", "Тэнгэрийн дуу", "Бясалгалын дуулал", "Гүр дуу" хэмээхийн домог түүх, бодит үнэн хоёрын дундуур сүлжилдсэн, дууны нууц эрдмийн олон талыг ийнхүү "авианы нууц увдис", "авианы тунгалаг мэдэл", "таван мэдрэмжийн" хаалга хатавчнаас хэдийнээ давж одоод, зургаа дахь мэдрэхүй, долоо дахь ухаарал болсон бясалгалын дууны "био хэмнэл", "био эрчим хүч" гэдэгтэй холбон үзэхүл, энэхүү судлагчийг урд өмнөхийн улиг болсон хуучин үзэлтийн мухар замаар шогшсонгүй, дууны аялгуу эгшгийн нууц эрдмийг олон салбар ухааны уулзвар дээр, чухамхүү хүн гэдэг дөрвөн түмэн, найман мянган нууцын эрдэм цогцолсон тэр бодгалийн бие, хэл, сэтгэлийн зангилаан дээр авч үзэхийг хичээсэн хэмээн үзэж болно. Доктор, профессор Л.Хүрэлбаатар