Энэхүү бүтээл монгол бөөгийн амьд зан үйл, ёслол хүндэтгэлийн баримт сэлтийг үндэс болгон бөөллөгийн үед тохиолдох нэгэн цул мэт үргэлжлэх дуудлагыг төрөл зүйлчлэн ангилж ялгаа салгааг нь гаргаж учир зүйд нь нийцүүлэн тайлбарласан байна. Харин түүний дараах хэсэгт зан үйл хэмээгч нь чухам юу болох тухай Евро-Америкийн эрдэмтдийн сөргөлцсөн онол саналыг монгол бөөгийн зан үйлийн жишээгээр шинжлэн үзэж өөрийн саналыг дэвшүүлжээ. Зохиогчийн дэвшүүлж байгаагаар бол аливаа өдөр тутмын үйл дадгаалжиж зан үйл болохдоо дөрвөн зэрэглэлийг дамжих бөгөөд зэрэглэл нь дээшлэх тусмаа зан үйл доторх хэл хэлмэрээс өгүүлэгчийн ухамсар санамсар нь хасагдаж, утга мэдээлэл дамжуулах хүч нь сулардаг байна. Оюут мэргэн уншигч та эндээс өнөөгийн манай нийгэмд хүчтэй сэргэж байгаа бөө болоод бөөгийн арга засал, бөөллөгийн үеийн хэл хэлмэр нь чухам юу өгүүлдгийг, тэр нь зан үйл хэмээх ухагдахуунтай хэрхэн холбогдохыг мэдэж авах болно.

Тус бүтээлийн зохиогч доктор, профессор Дуламын Бум-Очир нь МУИС-ийн Антропологи, археологийн тэнхимийн профессор юм. Тэрээр 2000 онд Монгол Улсын ШУА-ийн Хэл зохиолын хүрээлэнд Хэл бичгийн ухааны докторын (Ph.D), 2006 онд Их Британий Кэмбрижийн Их Сургуулийн Нийгмийн антропологийн тэнхимд антропологийн докторын (Ph.D) зэргийг тус тус хамгаалсан байна.